चुनावपछि उडायो सपना हुरिले भन्दै ओली बालकोटमा क्यारेमबोर्ड खेलेर बस्छन्ः ईन्द्र बानियाँ

चितवन, वैशाख २७–

नेपाली कांग्रेस बागमती प्रदेशका सभापति ईन्द्र बानियाँले मानवताको सिद्धान्तमा पाँच दलिय गठबन्धन भएको बताएका छन् ।

आज (मंगलबार) चितवनको कालिका नगरपालिकामा सत्ता गठबन्धनले आयोजना गरेको चुनावी सभालाई सम्बोधन गर्दै बानिँयाले न्याय, धर्म, सँस्कृति, संस्कार, परम्परालाई स्वीकार गरेर मानवताको सिद्धान्तमा गठबन्धन भएको बताएका हुन् ।

यस्तै उनले रुखले हसिँया हतौडामा र हसिँया हतौडाले रुखमा भोट हाल्ने अभ्यास राष्ट्रिय सभामा भइसकेको बताए । यसैले यो गठबन्धनलाई अन्यथा लिन नहुने उनको भनाइ थियो । उनले शान्ति सम्झौताको खिलाबमा जानेहरु कांग्रेस हुनै नसक्ने समेत बताए ।

कांग्रेसले माओवादीलाई र माओवादीले कांग्रेसलाई भोट हाल्न सक्दैन भन्नु भ्रमको खेती गर्ने केपी ओलीलाई समर्थन गर्नु बराबर भएको उनको तर्क थियो । उनले गणतन्त्रलाई संस्थागत गर्न र समावेशी व्यवस्थालाई जोगाउन गरिएको गठबन्धनलाई सबैले गम्भीर रुपमा लिनुपर्ने बताए ।

यस्तै उनले केपी ओलीलाई भ्रमको खेतीको महानायकको संज्ञा दिए । ‘ओली एमसिसीको केसमा यिनीहरु टुट्लान अनी झ्याम्म तर मारेर खाउँला भनेर बसेका थिए । एमसीसी पास भयो ओली उत्तानो परे’ उनले भने, ‘ओली भ्रम र झुठको पुलिन्दाको महानायक हो ।’ उनले अघि भने,‘ज्योतिषले जस्तो असार १७ गतेबाट यो गठबन्धनमा गड्बड हुन्छ भन्दैछन् । हाम्रो गठबन्धनले जितेपछि उनको चाँही दिमाख गड्बड हुन्छ ।’

उनले स्थानीय तह, प्रदेश र प्रतिनिधि सभाको परिणामपछि ओली कमल थापासँग मिलेर बालकोटमा क्यारेमबोर्ड खेलेर बस्ने बताए । ‘स्थानीय तहको परिणाम आएपछि गड्बड हुन्छ अनी प्रदेश र प्रतिनिधि सभामा उत्तानो परेपछि यि दुइटै उडायो सपना हुरीले भनेर अंगालो मारेर क्यारेमबोर्ड खेलेर बस्ने हो बालकोटमा’– उनले भने ।

उनले सबै पालिकामा गठबन्धनका उम्मेदवारलाई भोट हालेर विजयी गराउन अपिल गरे । यस्तै उनले गठबन्धनका उम्मेदवारलाई विजयी भएपछि प्रतिवद्धता अनुसार काम गर्न आग्रह पनि गरे ।