सहकारीको वर्तमान अवस्था, चुनौती र समाधानसम्बन्धी अन्तर्क्रिया

रत्ननगर । रत्ननगर नगरपालिका सहकारी शाखाको आयोजनामा ६८ औँ राष्ट्रिय सहकारी दिवस–२०८१ को अवसरमा सहकारीको वर्तमान अवस्था, चुनौती र समाधानसम्बन्धी अन्तर्क्रिया कार्यक्रम सम्पन्न भएको छ ।

रत्ननगर नगरपालिकाका आर्थिक विकास समितिका संयोजक एवम् रत्ननगर–१० का वडाध्यक्ष कलाधर पौडेलको अध्यक्षतामा भएको अन्तर्क्रियामा सहकारीका सञ्चालक तथा कर्मचारीहरुमा आर्थिक अनुशासन कायम राख्नुपर्नेमा जोड दिए ।

सहकारीको रकम अपचलनमा सहकारीकै सञ्चालकहरु संलग्न रहेका कारण सहकारीप्रति आममानिसको साख घटेको उनले बताए । उनले सहकारीको मूल्य र मान्यताभित्र रहेर ऋण लगानी गरेका सहकारीहरुले प्रगति पनि गर्दै गएको उनको भनाइ थियो ।

सहकारी, उद्योग तथा पर्यटन शाखा प्रमुख अर्जुन पगेनीले सञ्चालन तथा सहजीकरण गरेको कार्यक्रममा विशिष्टअतिथि प्रमुख प्रशासकीय अधिकृत सुकदेव लम्सालले सहकारी ऐन, नियम र संरचनात्मक सुधारसम्बन्धी कार्यपत्र प्रस्तुत गरेका थिए ।

चितवन जिल्ला बचत तथा ऋण सहकारी संघका कोषाध्यक्ष एवम् रत्ननगर नगरपालिकाका सहकारी सल्लाहकार गोविन्दप्रसाद भट्टराईले सहकारीमा आर्थिक अनुशासन, बचत संरक्षण, सुरक्षित ऋण लगानी, कर्जा असुली, सहकारीमा जोखिम न्यूनीकरणसम्बन्धी प्रशिक्षण दिएका थिए ।

कार्यक्रममा महिला ऋण सहकारी संस्थाका तर्फबाट चन्द्राकुमारी चौधरी, बचत तथा ऋण सहकारीबाट जगदीशचन्द्र बराल, केन्द्रीय दुग्ध उत्पादक सहकारी संघका सल्लाहकार एकनारायण पौडेल, कृषि सहकारीबाट विष्णुकुमारी कट्टेल, पाञ्चायन डेरीका अध्यक्ष बाबुराम पन्तलगायतले आआफ्ना धारणा राखेका थिए ।