यात्रुवाहक बस कल्भर्टमा ठोक्किँदा आठ जना घाइते

चितवन । खैरहनी नगरपालिका वडा नं–८ स्थित सडकछेउको कल्भर्टमा बस ठोकिन गई दुर्घटना हुँदा बसमा सवार तीन महिलासहित आठ जना घाइते भएका छन् ।

पूर्वपश्चिम राजमार्गमा काँकडभिट्टाबाट बाग्लुङ जाँदै गरेको प्रदेश १–०१–००१ ख ४३८० नम्बरको बस सडकछेउको कल्भर्टमा ठोकिन गई दुर्घटना हुँदा बसमा सवार पर्वत मोदी गाउँपालिका वडा नं–१ बस्ने ७५ वर्षीय भद्रबहादुर क्षेत्री, सोही ठाउँ बस्ने ५२ वर्षीया हिरा शर्मा घाइते भएका छन् ।

यस्तै, बाग्लुङ नगरपालिका वडा नं–८ बस्ने २९ वर्षीय किसान विक, कास्की पोखरा महानगरपालिका वडा नं–३१ बस्ने ६० वर्षीय पदमबहादुर गुरूङ, सोही ठाउँ बस्ने ३० वर्षीया सन्तोषी गुरूङ, इलाम मंगलबारे नगरपालिका वडा नं–९ बस्ने ५३ वर्षीया तारा परियार, म्याग्दी बेनी नगरपालिका वडा नं–१० बस्ने ५६ वर्षीय शेरबहादुर पुन घाइते भएका छन् ।

इलाका प्रहरी कार्यालय, खैरहनीका अनुसार बस चालक झापा अर्जुनधारा गाउँपालिका वडा नं–११ बस्ने ४० वर्षीय मधुसूदन नेपाल प्रहरीको नियन्त्रणमा रहेका छन् ।