घुमौँ भरतपुर-२०२४ का शान्तिदूत कतारमा सम्मानित

भरतपुर । भरतपुर भ्रमण वर्ष-२०२४ अन्तर्राष्ट्रिय समन्वय उपसमितिका सदस्य एवं घुमौँ भरतपुर २०२४ का शान्तिदूत, समाजसेवी, लेखक, शिक्षाविद्, उद्यमी, दिवस घिमिरे कतारमा सम्मानित भएका छन् ।

घुमौँ भरतपुर २०२४ का विदेश विभागका प्रचारदूत दिवस घिमिरेलाई कतारको दोहामा विभिन्न संघसंस्थाले सम्मान गरेका छन् । पत्रकार रामजी बगालेले घुमौँ भरतपुर २०२४ लाई स्वीकार गर्दै शान्तिदूत दिवस घिमिरेलाई सम्मान गरेका हुन् ।

यसैगरी एनआरएनए कतारका अध्यक्ष रमेश भट्ट, एनआरएनए आइसिसी डेपुटी जेनेरल सेक्रेटरी प्रवीन गुरूङ, नेपाली कांग्रेस जनसम्पर्क मञ्च कतार प्रेसिडेन्ट अफ ओभरसिज नेपाली फोरम एनआरएनएका सञ्जय श्रेष्ठ, पूर्वरक्षामन्त्री ईश्वर पोख्रेल एवं कतारका शिक्षामन्त्री र स्काउट प्रमुखले ‘घुमौँ भरतपुर २०२४’ को आमन्त्रणालाई ग्रहण गर्दै शान्तिदूत दिवस घिमिरेलाई सम्मान गरेका हुन् ।

भरतपुर महानगरपालिकाले आयोजना गरेको भरतपुर भ्रमण वर्ष २०२४ को प्रचारप्रसार गर्ने उद्देश्यले घिमिरे हाल कतार भ्रमणमा छन् । उनी गैरआवासीय नेपाली संघ कतारको निमन्त्रणामा कतारमा आयोजना हुने विविध सम्मेलनहरुमा भाग लिन कतार गएका हुन् । कतारमा रहँदा उनले घुमौँ भरतपुरको व्यानरसहित विभिन्न कार्यक्रमहरुमा सहभागी हुने र त्यहाँका विज्ञहरुलाई निमन्त्रणा गर्नेछन् ।