भरतपुरको ब्रह्मपुरमा सेभेन ‘ए’ साइड फुटबल हुँदै

केशव

साउन १३, २०८१

share this:

भरतपुर । भरतपुर महानगरपालिका वडा नं-१६, ब्रह्मपुरमा साउन १८ गतेदेखि सेभेन ‘ए’ साइड फुटबल प्रतियोगिता हुने भएको छ । ब्रह्मपुर युथ क्लबको आयोजनामा उक्त प्रतियोगिता हुन लागेको हो ।

आइतबार आयोजित पत्रकार सम्मेलनमार्फत प्रतियोगिताबारे जानकारी दिइएको हो । साउन १८ गतेदेखि सुरू हुने प्रतियोगिता भदौ ३ गतेसम्म चल्नेछ ।

भंगेरीथान शिवघाटको मैदानमा हुने प्रतियोगितामा ४० टोली सहभागी हुने क्लबका अध्यक्ष विक्रम गुरूङले जानकारी दिए । प्रतियोगिताको विजेताले ट्रफीसहित एक लाख रुपैयाँ प्राप्त गर्नेछ । यस्तै, उपविजेताले ५० हजार रुपैयाँ प्राप्त गर्नेछ । यस्तै, विभिन्न विधाका उत्कृष्ट खेलाडीहरुलाई पनि नगदसहित पुरस्कारको व्यवस्था गरिएको गुरूङले बताए ।

पत्रकार सम्मेलनका प्रमुखअतिथि तथा प्रतियोगिताको प्रायोजक सेन्ट्रल कलेजका प्रिन्सिपल यज्ञविलास पौडेल (वाइबी) ले प्रतियोगिताको सफलताको कामना गरे । शिवघाट क्षेत्र पर्यटकीय क्षेत्रको रुपमा विकास भइरहेको भन्दै उनले यस प्रतियोगिताले त्यसमा थप टेवा पुग्ने विश्वास व्यक्त गरे । चितवन जिल्ला फुटबल संघका वरिष्ठ उपाध्यक्ष विजय घलेले प्रतियोगिताको सफलताको कामना गरे ।