मोटरसाइकलको ठक्करबाट बालक घाइते

रत्ननगर । रत्ननगर नगरपालिका वडा नं–१२, सालघारीमा मोटरसाइकलको ठक्करबाट ३ वर्षीय बालक गम्भीर घाइते भएका छन् ।

सालघारीबाट जयमंगलातर्फ जाँदै गरेको बागमती प्रदेश ०६–०१ प ७३१ नम्बरको मोटरसाइकलले बाराको कलैया–१२ घर भई हाल रत्ननगर–१२ बस्ने ममता केशरीका ३ वर्षीय छोरा प्रिन्स केशरी कुमार गम्भीर घाइते भएका हुन् ।

घाइते बालकको नयाँ मेडिकल कलेज (सिएमसी), भरतपुरमा उपचार भइरहेको र उपचारमा निजका आमा संलग्न रहेकी छन् ।

मोटरसाइकलसहित चालक रत्ननगर–११, जिरौना बस्ने २० वर्षीय प्रवेश थापालाई इलाका प्रहरी कार्यालय रत्ननगरले नियन्त्रणमा लिएको जनाएको छ ।