आइचर ट्रक र बोलेरो एकापसमा ठोक्किँदा तीन घाइते

भरतपुर । भरतपुर महानगरपालिका वडा नं–२९, दासढुङ्गामा आइचर ट्रक र बलेरो एकापसमा ठक्कर खाँदा तीन जना घाइते भएका छन् ।

मुग्लिनबाट नारायणगढतर्फ जाँदै गरेको प्रदेश २–०३–००१ ख ३०८२ नम्बरको आइचर ट्रक र विपरीत दिशाबाट आउँदै गरेको ना ४ ख ६९५८ नम्बरको बलेरो एक–आपसमा ठक्कर खाइ दुर्घटना भएको हो । सोही बलेरो पछाडि बा १३ च ४४२० नम्बरको कारसमेत ठोक्किएको थियो ।

आइचर चालक बाराको सिमरा–१ बस्ने २५ वर्षीय सुनिल सिंखडा, बलेरोमा सवार भरतपुर–१४ बस्ने २१ वर्षीय प्रितम विक, बलेरो चालक भरतपुर–१४ बस्ने ४३ वर्षीय पूर्णबहादुर विक घाइते भएका हुन् ।

आइचर चालक सिंखडाको पुरानो मेडिकल कलेज (सिएमएस), भरतपुरमा उपचार भइरहेको छ भने बलेरोमा सवार विकको भरतपुर सरकारी अस्पतालमा उपचार भइरहेको प्रहरीले जनाएको छ ।