उवासंघ–चितवन र कृषि तथा वन विश्वविद्यालयबीच सम्झौता

भरतपुर । उद्योग वाणिज्य संघ–चितवन र कृषि तथा वन विश्वविद्यालयबीच चितवनको कृषि विकासका साथै आधुनिकीकरणका लागि दुवै संस्थाले साझा धारणा बनाएर जाने विषयमा सम्झौता पत्रमा हस्ताक्षर भएको छ । बुधबार एक कार्यक्रमबीच कृषि तथा वन विश्वविद्यालयको कार्यालयमा सम्झौता पत्रमा हस्ताक्षर भएको हो ।

कार्यक्रममा बोल्दै कृषि तथा वन विश्वविद्यालयका उपकुलपति प्रा.डा. शारदा थपलियाले कृषि तथा वन विश्वविद्यालयले कृषि क्षेत्रमा शिक्षण, अनुसन्धान र सेवाहरूमा उत्कृष्टताको केन्द्र बन्न प्रयासरत रहिरहेको बताए । उनले विश्वविद्यालयले ग्रामीण सामाजिक–आर्थिक अवस्था सुधार गर्न कृषि र कृषि सम्बद्ध विज्ञानहरूमा दक्ष पेसेवरहरू विकास गर्दै रोजगारी सृजना गर्दै आइरहेको बताए ।

उनले राष्ट्रिय र अन्तर्राष्ट्रिय साझेदारहरूसँग संयुक्त अनुसन्धान सञ्चालन गर्दै आएको जानकारी गराउँदै नीति विकास र तालिमसहित सम्बन्धित सरकारी संस्थाहरूलाई व्यावसायिक सेवाहरूसमेत प्रदान गर्दै आएको बताए । कृषि तथा वन विश्वविद्यालयका विद्यार्थीहरूले कृषि समुदायमा उत्पादकत्व वृद्धि गर्न र दिगो जीविकोपार्जन प्रणाली सिर्जना गर्न कृषि चुनौतीहरूलाई सम्बोधन गर्ने ज्ञान र प्रविधिहरू उत्पादन गर्दै आइरहेको उल्लेख गर्दै अबको कृषि विकासमा उद्योगी व्यवसायीहरुको छाता संस्था उद्योग वाणिज्य संघ–चितवनसँग सहकार्य गरेर अगाडि बढ्दा चितवनको कृषि विकासले फड्को मार्ने विश्वास व्यक्त गरे ।

कार्यक्रममा उद्योग वाणिज्य संघ–चितवनका अध्यक्ष सुमनकुमार श्रेष्ठले संघले मुख्यतः चार क्षेत्रहरु शिक्षा, स्वास्थ्य, कृषि र पर्यटनमा केन्द्रित विभिन्न कार्यक्रमहरू गर्दै आएको बताउँदै सूचना प्रविधिको विकासमा पनि संघ लागिरहेको बताए । उनले संघले व्यावसायिक समुदायको हितको संरक्षण र प्रवद्र्धन गर्नुका साथै जिल्लामा सामाजिक कार्यहरूमा निजी क्षेत्रलाई परिचालन गर्न र आफ्ना सदस्यहरूमाझ चेतना जगाउन हरसम्भव प्रयास गर्दै आइरहेको बताए ।

सरकारी र गैरसरकारी संस्थाहरूको समन्वयमा सदस्यहरूलाई आवश्यकतामा आधारित सेवाहरू प्रदान गर्दै तालिम, कार्यशाला र सेमिनारहरू सञ्चालन गरेर आफ्ना सदस्यहरूको क्षमता अभिवृद्धि गर्दै आइरहेको उनले जानकारी दिए ।

सम्झौता पत्रमा कृषि, पशु चिकित्सा विज्ञान, मत्स्यपालन र कृषि व्यवसायमा अनुसन्धान, नवप्रवर्तन र सीप विकासलाई प्रवद्र्धन गर्ने, दिगो आर्थिक वृद्धिको लागि उद्योग–शिक्षा सम्बन्धलाई सुदृढ पार्ने, कृषि तथा पशुधन क्षेत्रमा प्रवद्र्धन गर्ने, बजार सम्बन्ध र उद्यमशीलताको विकास गर्ने, व्यवसाय इन्क्युवेसन केन्द्रहरू स्थापना गर्ने, किसान, उद्योग र अर्थतन्त्रलाई फाइदा पुग्ने नीति र अभ्यासहरूको वकालत गर्ने, कृषि सम्बन्ध व्यवसायीहरुलाई तालिम सेमिनार सञ्चालन गर्नेलगायत कृषिसम्बन्धी कार्य तथा विकासका लागि दुवै संस्था मिलेर लाग्ने उल्लेख गरिएको छ ।

सम्झौता पत्रमा कृषि तथा वन विश्वविद्यालयको तर्फबाट उपकुलपति प्रा.डा. शारदा थपलिया र उद्योग वाणिज्य संघ–चितवनको तर्फबाट संघका अध्यक्ष सुमनकुमार श्रेष्ठले हस्ताक्षर गरेका थिए । कार्यक्रममा संघका उपाध्यक्ष राजेन्द्र ओली र कृषि तथा वन विश्वविद्यालयका प्रतिनिधिहरुको सहभागिता रहेको संघका कार्यक्रम अधिकृत गणेश सुवेदीले जानकारी दिए ।