कार र मोटरसाइकल ठोक्किँदा दुई सैनिक जवानको मृत्यु

भरतपुर । भरतपुर महानगरपालिका–१ पोखरा बसपार्कमा मोटरसाइकल र कार ठोक्किँदा दुई जना सैनिक जवानको मृत्यु भएको छ ।

नेपाली सेनाको नम्बर-२ विपद् व्यवस्थापन गण रसौलीमा कार्यरत २७ वर्षीय सिपाही निगम नेपाली सार्की र सिपाही दिनेश थापाको मृत्यु भएको हो । उनी तनहुँ भानु नगरपालिका–१२ का स्थायी बासिन्दा हुन् ।

जिल्ला प्रहरी कार्यालयका प्रवक्ता भेषराज रिजालका अनुसार सोही गणमा कार्यरत बन्दीपुर गाउँपालिका–३ का २६ वर्षीय गम्भीर घाइते दिनेश थापाको समेत उपचारका क्रममा मृत्यु भएको छ । मंगलबार राति बसपार्कबाट रामनगरतर्फ गइरहेको कारले विपरीत दिशाबाट आइरहेको उनीहरु सवार मोटरसाइकललाई ठक्कर दिएको थियो ।

दुर्घटनामा घाइते दुवै जनाको चितवन मेडिकल कलेजमा उपचार भइरहेको थियो । उपचारका क्रममा दुवै सैनिक जवानको मृत्यु भएको हो ।