बस रुखमा ठोक्किँदा १३ जना घाइते

माडी । माडी नगरपालिका वडा नं–१, वनकट्टामा बस अनियन्त्रित भई रुखमा ठोक्किँदा बसमा सवार १३ जना घाइते भएका छन् । भरतपुरबाट माडीतर्फ आउँदै गरेको ना ६ ख ९३६६ नम्बरको बस अनियन्त्रित भई रुखमा ठोक्किएको थियो ।

दुर्घटनामा बसमा सवार माडी–१ बस्ने ३५ वर्षीया सानिता महतो, निजकी १० वर्षीया छोरी एलिसा महतो, माडी–६ बस्ने ६० वर्षीया सुकमाया सुनार, निजका श्रीमान् ७५ वर्षीय तुलबहादुर सुनार, माडी–५ बस्ने ४० वर्षीया पार्वती अधिकारी, सोही ठाउँ बस्ने ६८ वर्षीया सरस्वती श्रेष्ठ, माडी–६ बस्ने २८ वर्षीया नम्रता महतो, २८ वर्षीया अमृता महतो, २८ वर्षीया संगीता सुनार, माडी–७ बस्ने ३७ वर्षीया प्रेमकुमारी तामाङ, निजका भतिज ४ वर्षीय अरतन महतो, पर्सा घर बताउने २५ वर्षीया विनिता चौधरी र खैरहनी–१० बस्ने ६७ वर्षीया बिसुल महतो घाइते भएका हुन् ।

घाइतेहरुको बघौडा अस्पताल, माडीमा उपचार भइरहेकोमा ११ जना उपचारपश्चात् डिस्चार्ज भएका छन् । बस चालक नवलपुरको कावासोती–७ घर भई हाल माडी–२ नयाँ पर्सास्थित ससुराली घरमा बस्ने ३८ वर्षीय पुरणबहादुर महतोलाई प्रहरी चौकी बरुवाको नियन्त्रणमा रहेको प्रहरीले जनाएको छ ।