माघ १६ गते जनआन्दोलन घाइते समितिले अधिवेशन गर्ने

भरतपुर । नेपाल जनआन्दोलन शहीद परिवार तथा घाइते समिति चितवनको कार्यसमितिको बैठकले माघ १६ गते शहीद दिवसको दिन साधारण सभा तथा अधिवेशन गर्ने निर्णय गरेको छ ।

समितिका अध्यक्ष सूर्यप्रसाद श्रेष्ठको अध्यक्षतामा बसेको बैठकले जनआन्दोलन घाइतेको सेवासुविधाको लागि सरकारको ध्यानाकर्षण गराउने र समितिको साधारण सभामा विशिष्ट व्यक्ति तथा विभिन्न जिल्लाका पदाधिकारीलाई आमन्त्रण गर्ने निर्णय गरेको हो ।

नेपाल सरकार मन्त्रिपरिषद्को २०६३ साल पुस २७ गतेको निर्णयअनुसार २०६३–६३ सालका शहीद परिवार, जनआन्दोलन घाइते तथा तिनका परिवारलाई शिक्षा र स्वास्थ्यमा निःशुल्क सेवा दिने र यातायात र रोजगारीमा विशेष सुविधा दिने निर्णय गरिएको थियो ।

यस्तै, नेपालको संविधान–२०७२ को धारा ४२ को उपधारा ५ मा जनआन्दोलनका घाइतेहरुलाई सुविधा दिने निर्णय गरिएकोमा के कति कारणले निर्णय कार्यान्वयन नभएको हो भन्ने विषयमा सरकारको ध्यानाकर्षण गराउने निर्णय भएको अध्यक्ष श्रेष्ठले बताए ।

यस्तै, जनआन्दोलन घाइते समिति चितवनको कार्यविधि प्रभावकारीरुपमा अगाडि बढाउन माघ १६ गते शहीद दिवसको दिन साधारण सभा तथा अधिवेशन सम्पन्न गर्ने निर्णय भएको अध्यक्ष श्रेष्ठले जानकारी दिए । साधारण सभा तथा अधिवेशनको लागि पदाधिकारी तथा अतिथिहरुलाई पत्राचार भइसकेको उनले बताए ।