बाढीले बगाउँदा सिद्धिका एक युवक बेपत्ता

सिद्धि । कालिका नगरपालिका वडा नं-१० स्थित तीनदोभानमा बाढीले एक जनालाई बगाएर बेपत्ता पारेको छ । स्थानीय आइतबहादुर चेपाङका अनुसार दमायोडाँडा स्वीकाराङका अन्दाजी ३० वर्षीय युवा गम्भीर चेपाङलाई बाढीले बगाएको हो । गम्भीरलाई सिद्धिबाट घर फर्किने क्रममा साँझ ६ बजेतिर ठूलो पानी परेपछि आएको बाढीले बगाएको आइतबहादुरले बताए ।

जिल्ला प्रहरी कार्यालय चितवनले भने बाढीले मान्छे बगाएको खबर आएपछि खोजी कार्य जारी राखेको बताएको छ । सिद्धिबाट दक्षिणको भेग सौराहासम्म प्रहरी खटाएर खोजी कार्य जारी राखेको जिल्ला प्रहरी कार्यालय चितवनका प्रवक्ता एवम् प्रहरी नायव उपरीक्षक भेषराज रिजालले जानकारी दिए ।

स्थानीयकै भनाइअनुसार खोजी गरिएको उनले बताए । ‘स्थानीयले मान्छे बगायो भनेर खबर गरेपछि प्रहरी परिचालन गरेर खोजी जारी राखेका छौँ,’ उनले भने ।